Myihtoi Habaku gaw shi a mungdan kata hta tara rap rai ai lam n nga ai hta sha n ga, tinang hta n gun grau ja ai, gum shem ai Babylon masha ni e matut zingri dip sha wa na lam (1:5-11) hpe chye ai shaloi, K.K hpe ning nga tsun jahtau nu ai:
N hkru n hkra ai hpe n yu hkra, myit magaw ai lam n mada hkra, san seng ai myi tu ai wa e, nang hpa majaw hkalem hkalau ai wa hpe a mada nga ai hte, tara n lang ai wa gaw, shi hta grau ding hpring ai wa hpe jahtum kau… (nga yang) nang hpa majaw atsin sha yu nga n ta?(1:13, 14b). Yehowa e, nang n madat ya ai, ngai gaten du hkra hpyi jahtau na rai ta? (1:1).
K.K Yehowa hpe ning ngu ga san ni hte pawt lai wa sai myihtoi Habaku hpang jahtum tsun ai kraw dung nsen gaw:
“Shing rai, lakum hpun gaw pu n pu, Tsabyi ru gaw asi n si, Tsanlun hpun gaw kaman sha tu, Yi hkauna mung nai mam n pru; Sagu lawng hta sagu hpung kata. Dumsu lawng hta dumsu n pra, ti mung, Ngai gaw Yehowa hta kabu gara nga na nngai; Ngai hpe hkye hkrang la ai Karai Kasang hta sharawng awng nga na nngai.” (3:17).
Hpa majaw Habaku ning ngu ai ga hpe lu tsun ai rai ta? Habaku gaw lani mi K.K Yehowa a tara rap ra ai lam shi a mungdan hte shi a myu masha ni lapran dik tup wa na re hpe tup hkrak kam sham ai majaw re. Tinang a n re ai sut gan mahkawng da nna, tinang a ntsa e ru hka shalaw (2:6) nga ai, “tinang tsip hpe matsaw ntsang de tsip da nna, ru tsang ai lata na lawt lu hkra, tinang a nta matu n tara ai amyat sha” (2:9) nga ai hte “asai jahkaw ai hte, kahtawng de ai wa, myit magaw ai hte, mare (mungdan) shangang” (2:12) nga ai Babylon hkawm hkam wa hte shi a asuya up hkang masa ni hpe K.K lani mi teng sha dingnye jaw je yang na lam Habaku gaw K.K kaw nna mungga na la nu ai. Dai majaw Yehowa K.K Habaku hpe shadum ai gaw: ding hpring ai wa chyawm gaw, shi a kam sham ai hte hkrung nga lu na ra ai (2:4) nga ai re. Ndai tengman ai mungga hpe na la lu ai hte dai hpe kam sham nga ai majaw Habaku gaw lahta na hte maren K.K hpe shakawn lu nga ai re.
Ndai mungga gaw dai ni anhte yawng hpe matut shadum let n gun jaw nga ai hpe galoi mung myit dum n gun la let kam sham myit hte asak hkrung nga ga law.
No comments:
Post a Comment